Giorno: 1 Agosto 2017

Ino Fragna, poeta e critico letterario, noto nel panorama culturale non solo napoletano, ha voluto con questa sua poesia omaggiare il grande Totò nel cinquantenario della morte.

 

NA LETTERA ‘E TOTO’

So’ cinquant’anne ca me ne so’ ghiuto

e nun pozzo dì’ ca ‘e me v’îte scurdàto.

Televisione, cinema, triato

chest’arta mia l’hanno ricanusciuta.

 

Chist’anno po’ vuie avite esagerato,

dduie monumente, libbre, fest’’e piazza!

Si forze nun fuie nobbele pe’rrazza

sti cinquant’anne m’hanno consacrato!

 

Comme nu personaggio d’’a Livella

so’ asciut’’e sera pe’  na cammenata

d’’e ppart’’a Sanità me so’ avviato

ma chello c’aggio visto nun è bbello…

 

Surdate mmiez’â via cu ‘e mitra ‘mmano,

dice ca stanno ccà pe’ vvia d’’e stese…

so’ vvoce ‘e venneture, panne spase?

“Vuie nun sapite niente? Eppure è stano”

 

M’ha ditto ‘o parrucchian’’e San Vicienzo

“ ma vuie nun stat’’ô munno ‘a verità?”

“Me dispiace, chesta è ‘a Sanità”

“addo’ s’è pperz’’o limite e ‘a pacienza!”

Diteme Reverè: che ssongo ‘e stese?

“So’ sparatorie c’hanno ‘a fa’ mpressione”

“’a statua mmiez’ô llargo… è nu guaglione”

“ e ‘a bbenedico trenta vote ô mese!”.

 

Che brutta fine ha fatto stu quartiere,

i’ te smuntav’’e guappe cu ‘a resata,

sti criminale mbece, a mmano armata,

accideno pe’ sfizio e pe’mmestiere!

 

Nun me pô ffà’ cuntento chesta festa

e favuze me sape st’allerìa

quanno ‘a paura corre mmiez’â via

e  po’ ve fa nzerrà porte e ffeneste!

 

No, nun ce torno cchiù ‘int’â Sanità,

è na buscia ca tutt’è comme aiere,

ve l’aggio ‘a dì’: faciteme ‘o piacere,

napulità… mparateve a ccampà!

Ino Fragna